Şuşadakı yay düşərgəsində panel iclası keçirilib

 

Xəbər verdiyimiz kimi, avqustun 2-dən 8-dək Diasporla İş üzrə Dövlət Komitəsinin və Heydər Əliyev Fondunun birgə təşkilatçılığı, Gənclər və İdman Nazirliyi, Gənclər Fondu, Dövlət Turizm Agentliyi və Şuşa Şəhəri Dövlət Qoruğu İdarəsinin tərəfdaşlığı ilə Şuşa şəhərində Diaspor Gənclərinin III Yay Düşərgəsi keçirilib.

Düşərgə çərçivəsində “Xalq diplomatiyasında və lobbi fəaliyyətinin qurulmasında diaspor gənclərinin rolu” mövzusunda panel iclası keçirilib.

Diasporla İş üzrə Dövlət Komitəsinin sədr müavini Vaqif Seyidbəyovun moderatorluğu ilə aparılan panel iclasında Azərbaycanın sabiq Baş naziri, xarici işlər naziri və müxtəlif ölkələrdəki səfiri vəzifələrində çalışmış Həsən Həsənov, ölkəmizin Bosniya və Herseqovinadakı fövqəladə və səlahiyyətli səfiri Vilayət Quliyev, Avropa Şurası yanında daimi nümayəndəmiz Fəxrəddin İsmayılov və Xarici İşlər Nazirliyinin Beynəlxalq təhlükəsizlik idarəsinin rəisi Yalçın Rəfiyev çıxış ediblər.

Məruzəçilər xaricdə yaşayan azərbaycanlı gənclərin siyasi və diplomatik biliklərə, Azərbaycanın tarixi və xalqımızın milli-mənəvi dəyərləri barədə geniş məlumata malik olmasının vacibliyindən danışıblar.

“Əgər siz yaşadığınız cəmiyyətlərdə Azərbaycanı təmsil etmək istəyirsinizsə, mütləq bu bilikləri mənimsəməlisiniz. Həmin biliklərə yiyələnməyin bir yolu da belə layihələrin təşkilindən keçir”, – deyə Həsən Həsənov bildirib.

Səfir Vilayət Quliyev qeyd edib ki, Azərbaycanın keyfiyyətcə yeni diasporu yaranır. Bu baxımdan, diaspor nümayəndələrinin həm yaşadıqları ölkənin, həm də Azərbaycan dilini bilmələri vacibdir. Daha geniş əlaqələrə malik olduqları halda onlar həm o cəmiyyətə, həm də Azərbaycana faydalı olacaqlar.

Avropa Şurası yanında daimi nümayəndə Fəxrəddin İsmayılov diaspor gənclərini ünsiyyət bacarıqlarını artırmağa çağırıb.

Xarici İşlər Nazirliyinin idarə rəisi Yalçın Rəfiyev Azərbaycanın multikultural və tolerant ölkə olmasının diaspor təşkilatlarının ölkəmizi təbliğ etməsi üçün əlavə üstünlük olduğunu vurğulayıb.

Panel iclası qarşılıqlı fikir mübadiləsi ilə davam edib.