Azərbaycan Dövlət Gənc Tamaşaçılar Teatrında aktrisa Xalidə Əliməmmədovanın 50 illik yubileyi "Göyçək Fatma” tamaşası ilə qeyd edilib.

Teatrın mətbuat xidmətindən verilən məlumata görə, tamaşadan əvvəl çıxış edənlər aktrisanın iştirak etdiyi tamaşalardakı obrazları haqqında danışıb və ona yaradıcılıq uğurları arzulayıblar.

Yubilyara Azərbaycan Mədəniyyət İşçiləri Həmkarlar İttifaqı Respublika Komitəsinin təbrik məktubu və fəxri fərmanı, Azərbaycan Teatr Xadimləri İttifaqının fəxri fərmanı və teatrın diplomu təqdim edilib. Yubilyar göstərilən diqqətə görə hər kəsə minnətdarlığını bildirib.

Sonra tamaşa nümayiş olunub. Quruluşçu rejissoru Xalq artisti Cənnət Səlimova, rəssamı Mustafa Mustafayev olan nağıl-tamaşada rolları Xalq artisti Nübar Novruzova, Əməkdar artist Güvşər Şərifova, aktyorlar Zemfira Əbdülsəmədova, Xalidə Əliməmmədova, Asya Atakişiyeva, Ədalət Əbdülsəmədov, Anar Seyfullayev, Sevinc Əziz, İradə Rəşidova, Xaliq Bəkir, Yusif Dadaşov və Mələk Bəxtiyarlı canlandırıblar.