Qara Qarayevin ölməz əsərinin yeni xoreoqrafik tərtibatda nümayişi Rusiya tamaşaçılarını heyran etdi
   
   Fevralın 21-də Rusiya Akademik Böyük Teatrının əsas səhnəsində Azərbaycan Dövlət Akademik Opera və Balet Teatrının balet truppası artistlərinin ifasında dahi bəstəkar Qara Qarayevin “Yeddi gözəl” baleti nümayiş olunub. 
   
   Azərbaycan Opera və Balet Teatrında yeni quruluşda və xoreoqrafik tərtibatda 2008-ci ilin axırlarında göstərilmiş “Yeddi gözəl” baleti Nizami Gəncəvinin eyniadlı poemasının motivləri əsasında yaradılıb. Tamaşanı İstanbul Dövlət Opera və Balet Teatrının dirijoru Elşad Bağırovun rəhbərliyi ilə Azərbaycan Opera və Balet Teatrının simfonik orkestri müşayiət edib.
   Baletin quruluşçu baletmeysteri Vasili Medvedyev, quruluşçu-rəssamı Dmitri Çerbadji, geyim üzrə rəssamı isə Tahir Tahirovdur. Tamaşada Bəhram şah rolunu teatrın aparıcı solisti Mixail Lobuxin oynayıb. Gözəllər gözəli rolunda isə Azərbaycanın Əməkdar artisti Kamilla Hüseynova çıxış edib.
   Balet yeni libretto əsasında tamaşaya qoyulub. Librettonun müəllifi əslən Rusiyadan olan, hazırda Türkiyədə yaşayan musiqiçi Yana Temuzdur.
   Tamaşa Moskva sakinlərinin böyük marağına səbəb olub. Tamaşaya bütün biletlər nümayişdən bir neçə gün öncə satılıb qurtarmışdı.
    Rusiyanın mədəniyyət naziri Aleksandr Avdeyev tədbirin rəsmi hissəsini açaraq qeyd edib ki, Rusiyada Azərbaycan mədəniyyət xadimlərinin qastrollarının təşkil edilməsi hələ sovet dövründən gözəl bir ənənəyə çevrilib: “Yeddi gözəl” baletinin budəfəki quruluşda tamaşası Rusiya və Azərbaycan xoreoqraf və artistlərinin birgə layihəsidir. Biz qardaş Azərbaycanın sevimli nümayəndələrini bu səhnədə salamlamağa çox şadıq”.
   Azərbaycanın mədəniyyət və turizm naziri Əbülfəs Qarayev tamaşaçıları salamlayaraq deyib ki, 50-ci illərin əvvəlində yazılmış və keçmiş SSRİ-nin teatr səhnələrində uzun illər boyu nümayiş etdirilmiş bu baleti Böyük Teatr səhnəsində təqdim etmək çox böyük şərəf və məsuliyyət deməkdir: “Yeddi gözəl” baleti Böyük Teatrın səhnəsində ilk dəfə tamaşaya qoyulur. Bu, həm orkestr üçün, həm də balet kollektivi üçün çox böyük məsuliyyətdir. Baletin yeni versiyası əvvəlkindən fərqlənir, lakin bu versiya bizi sanki böyük Nizaminin dövrünə qaytarır, qədim Şərq fəlsəfəsini, o dövrün duyğu və estetik aləmini canlandırır. Bizim sıx yaradıcılıq əlaqələrimiz bir daha təsdiq edir ki, mədəniyyət sərhəd tanımır, istər sovet dövründə, istərsə də müstəqillik illərində yaradılan əsərlər mübadilə edilməyə, bizim dostluq, qardaşlıq əlaqələrimizi daim davam etdirməyə layiqdir”.
   Qeyd edək ki, nümayişdən öncə İTAR-TASS agentliyində “Yeddi gözəl” baletinin Moskva premyerasına həsr edilmiş mətbuat konfransı keçirilib. Mətbuat konfransında Azərbaycanın mədəniyyət və turizm naziri Əbülfəs Qarayev, Rusiya prezidentinin beynəlxalq mədəni əməkdaşlıq məsələləri üzrə xüsusi nümayəndəsi Mixail Şvıdkoy, Azərbaycanın Rusiyadakı fövqəladə və səlahiyyətli səfiri Polad Bülbüloğlu iştirak ediblər.
   Azərbaycanın mədəniyyət və turizm naziri Əbülfəs Qarayev xatırladıb ki, Qara Qarayevin, Üzeyir Hacıbəylinin, Fikrət Əmirovun əsərləri vaxtilə Sovet İttifaqının bütün guşələrində səslənib və həmişə tamaşaçıların rəğbətini qazanıb. O vurğulayıb ki, budəfəki tamaşa iki ölkənin incəsənət ustalarının birgə səyləri ilə hazırlanıb: “Biz dövlətlərimiz arasında mədəni əlaqələrin genişlənməsi və möhkəmlənməsinə həmişə tərəfdar olmuşuq. Bakıda və Moskvada keçirilən çoxsaylı ənənəvi birgə tədbirlər bunu təsdiq edir”.
   Rusiya prezidentinin beynəlxalq mədəni əməkdaşlıq məsələləri üzrə xüsusi nümayəndəsi Mixail Şvıdkoy deyib: “Qara Qarayevin “Yeddi gözəl” baleti Azərbaycan və Rusiya incəsənət ustalarının yaradıcı əməkdaşlığının bəhrəsidir”. O, “Yeddi gözəl” baletinin Moskva premyerasının böyük əhəmiyyət kəsb etməsini vurğulayaraq xatırladıb ki, Qara Qarayevin ”İldırımlı yollarla” baleti vaxtilə Minskdən Düşənbəyə qədər, SSRİ-nin demək olar ki, bütün səhnələrində tamaşaya qoyulub, böyük Azərbaycan bəstəkarının musiqisi Georgi Tovstonoqovun quruluş verdiyi “Nikbin faciə” tamaşasını və Qriqori Kozintsevin “Hamlet” filmini müşayiət edib.
   Azərbaycanın Rusiyadakı fövqəladə və səlahiyyətli səfiri Polad Bülbüloğlu tamaşanı iki ölkənin mədəni həyatında mühüm hadisə olduğunu vurğulayıb: “Baletin anşlaqla keçməsi və 20 xarici ölkə səfirinin izləyicilər arasında olması bunun göstəricisidir. Bütün bunlar Azərbaycan mədəniyyətinin və bütövlükdə Azərbaycanın imicinin möhkəmləndirilməsinə xidmət edir”.