Ermənistan silahlı qüvvələrinin sentyabrın 27-dən oktyabrın 30-dək Azərbaycanın yaşayış məntəqələrini, mülki şəxsləri atəşə tutması nəticəsində 7 ailə tamamilə məhv olub. Bundan başqa, 4 uşaq hər iki valideynini itirib.

Bu barədə Azərbaycan Respublikasının Baş prokuroru Kamran Əliyev oktyabrın 30-da Baş Prokurorluqda Ermənistan Silahlı Qüvvələrinin Azərbaycanın mülki əhalisinə qarşı törətdiyi cinayətlərlə bağlı ölkəmizdə akkreditə olunan diplomatik korpusun, beynəlxalq təşkilatların, yerli və beynəlxalq media qurumlarının nümayəndələri üçün təşkil olunan brifinqdə məlumat verib.

Baş prokuror bildirib ki, sentyabrın 27-dən oktyabrın 30-dək həlak olan 91 mülki şəxsin 1-i körpə, 10-u uşaq, 27-si qadın, 53-ü kişi, 15-i ahıldır.

Ermənistan silahlı qüvvələri oktyabrın 4-də, 5-də, 8-də, 11-də və 17-də Gəncə şəhərində dinc əhalini ağır artilleriya və raket atəşinə tutması nəticəsində 26 nəfər, o cümlədən 10-qadın və 6 uşaq həlak olub, 57-si qadın, 32-si uşaq olmaqla 142 nəfər yaralanıb.

Bərdə rayonunda isə 27 dinc sakin (8 qadın və 1 uşaq) həlak olub, 101 nəfər, o cümlədən 26 qadın və 14 uşaq xəsarət alıb.

Kamran Əliyev vurğulayıb ki, düşmənin raket və ağır artilleriya atəşləri nəticəsində Tərtər rayonunda 17 (o cümlədən 1 uşaq, 1 qadın), Goranboy rayonunda 8 (2-si qadın, 5-i uşaq), Ağdam rayonunda 7 (1-i qadın), Füzuli rayonunda 3 nəfər, Beyləqan rayonunda 2 qadın və Ağcabədi şəhərində 1 uşaq həlak olub.

Xatırladaq ki, oktyabrın 28-də düşməninBərdə şəhərinə beynəlxalq konvensiyalarla qadağan edilmiş kasetli raketlərlə (“Smerç”) atəş açması nəticəsində 20 nəfər həlak olmuşdu.

Oktyabrın 29-da Ermənistan silahlı qüvvələrinin bölmələri tərəfindən Goranboy rayonu müxtəlif istiqamətlərdən intensiv raket və ağır artilleriyadan atəşə tutulması nəticəsində rayonun Tapqaraqoyunlu kəndinin sakini 1967-ci il təvəllüdlü Ziyadova Flora Qaraş qızı həlak olub.

Sentyabrın 27-dən bəri Ermənistan silahlı qüvvələrinin artilleriya atəşi nəticəsində 2300-dən çox ev, 92 çoxmənzilli yaşayış binası və 400-dən çox mülki obyekt yararsız vəziyyətə düşüb.