Əməkdar artist, pianoçu, bəstəkar və aranjemançı İsfar Sarabski “Warner Music Group” leyblında ilk albomunu çıxarıb.

Pianoçunun dünyaca məşhur “Warner Music Group” şirkətinin əməkdaşlığı ilə yazılan “Planet” albomu 30 aprel – Beynəlxalq Caz Günündə işıq üzü görüb.

“Albom mənim dünyamıza olan hisslərimi və düşüncələrimi ümumiləşdirdiyi üçün “Planet” adlanır. Mən son illər bizim hamımıza təsir edən hadisələr, düşdüyümüz vəziyyətlər, dinləyicilərimlə dialoqa çıxmaq yollarım barədə düşünürəm”, – deyə İ.Sarabski qeyd edir.

“Warner Music Group” – həcminə və səsyazma studiya şəbəkəsinə görə “böyük səsyazma şirkətləri üçlüyünə” daxil olan üçüncü konserndir. Sarabski “Warner Music Group” şirkəti ilə iki – elektron və caz musiqisi albomunun buraxılması üçün 2019-cu ilin dekabrında müqavilə imzalayıb. Həmçinin müqavilədə əlavə layihə və albomların buraxılması imkanı da nəzərdə tutulur.

Qeyd edək ki, İsfar Sarabski “Warner Music Group” şirkəti ilə biznes-müqavilə bağlayan ilk azərbaycanlı cazmendir.