Hollivud Xarici Mətbuat Assosiasiyasının (Hollywood Foreign Press Association – Hollivudda akkreditə olunmuş əcnəbi jurnalistlərin birliyi) təsis etdiyi “Qızıl qlobus” mükafatının (Golden Globe Award) növbəti, 81-ci təqdimatı olub.

2024-cü ildə audiovizual sənət dünyasının ilk mükafatının sahibləri yanvarın 7-də Beverli-Hills şəhərində (Kaliforniya ştatı) keçirilən mərasimdə elan edilib.

Mərasimin favoritlərindən sayılan “Oppenheymer” filmi (rejissor Kristofer Nolan) təxminləri doğruldub. Atom bombasının yaradıcısı amerikalı fizikin (Robert Oppenheymer) həyatından bəhs edən film 8 nominasiyada “Qızıl qlobus”a iddiaçı idi və 4 mükafat qazanıb.

“Oppenheymer” “Qızıl qlobus”lardan ən nüfuzlusu sayılan “Ən yaxşı dram filmi” nominasiyası üzrə qalibi olub. Kristofer Nolan ən yaxşı rejissor kimi, Robert Oppenheymer obrazını canlandıran Kilian Mörfi (Cillian Murphy) ən yaxşı dram filmi aktyoru, Robert Dauni (Downey) isə bu filmdəki roluna görə ikinci planda ən yaxşı aktyor olaraq “Qızıl qlobus” qazanıblar.

9 nominasiyada mükafata namizəd olan “Barbi” filmi (rejissor Qreta Qerviq) cəmi iki “Qızıl qlobus”a layiq görülüb. “Warner Bros. Pictures”in böyük rezonans doğuran filmi “Ən yaxşı mahnı” (Billie Eilish, “What Was I Made For”) və “Ən yaxşı prokat gəliri” (100 milyon dollardan çox gəliri olan filmlər üçün nominasiya ilk dəfə elan edilib) nominasiyaları üzrə mükafat əldə edib.

Bu iki filmə rəqib sayılan, məşhur rejissor Martin Skorsezenin çəkdiyi, Robert de Niro və Leonardo di Kaprio kimi ulduzların rol aldığı “Ay çiçəyi qatilləri” isə mükafatsız qalıb.

“Xarici dildə ən yaxşı film” nominasiyasının qalibi Fransa istehsalı olan “Düşmənin anatomiyası” (“Anatomy of a fall”) olub. Ekran əsəri “Ən yaxşı ssenari” nominasiyası üzrə də mükafat qazanıb. Rejissor Jüstin Triyenin filmi ötən il Kann festivalında baş mükafata sahib olmuşdu.

Hayao Miyazakinin “Oğlan və quş”u Ən yaxşı animasiya filmi” kimi mükafatın qalibi olub.

Emma Stoun ABC kanalında yayımlanan “Sağ qalmaq” (“The Lost and Lost”) mistik dramındakı roluna görə “Ən yaxşı aktrisa” nominasiyasında seçilib. “Ən yaxşı ikinci plan qadın rolu” üzrə mükafatı isə Davan Joy Randolph (“The Leftovers” – “Artıqlar”, HBO  serialı) alıb.

Qeyd edək ki, 1944-cü ildən təqdim edilən “Qızıl qlobus” Amerika kinosunun “Oskar”dan sonra ikinci nüfuzlu mükafatıdır. “Qızıl qlobus” kinematoqrafçılar üçün “Oskar”a aparan yol hesab edilir...

V.Kamal